गरम भट्टी आणि कोरडा घसा! दिल्लीकरांची प्रचंड होरपळ! (दै. नवशक्ती)
गरम भट्टी आणि कोरडा घसा ! दिल्लीकरांची प्रचंड होरपळ ! देशाच्या राजधानीत असलेले दिल्लीकर सध्या प्रचंड त्रस्त आहेत. आग ओकणारा सूर्य, प्रचंड उकाडा, पाण्याचे तीव्र दुर्भिक्ष्य, टँकरसाठी वणवण अशा विचित्र आणि कठीण अवस्थेला त्यांना तोंड द्यावे लागत आहे. राजकीय पक्ष, नेते आणि सरकार हे राजकारणात गुंतले आहेत. सर्वोच्च न्यायालयाचा दरवाजा ठोठावूनही दिल्लीकर जणू गरम भट्टीत घसा कोरडे करुन बसलेले आहेत. हे असे का झाले ? यास कोण जबाबदार आहे ? भावेश ब्राह्मणकर राजधानी दिल्ली ही रणभूमी आहे. आजवरचा इतिहास तपासला तर असे लक्षात येईल की, येथे लहान-मोठे आणि घनघोर असे असंख्य युद्ध झाले आहेत. त्यामुळेच दिल्लीत नेहमीच अतिशय पराकोटीचे हवामान असते, असे म्हटले जाते. एका तज्ज्ञाच्या मते, या रणभूमीवर प्रचंड संहार झाल्याने मृतात्म्यांमुळे ही भूमी शापित आहे. म्हणूनच ती असंख्य कसोटी पाहत असते. यात तथ्य असो वा नसो पण दिल्लीत उन्हाळा अतिशय तीव्र (म्हणजे किती तर कमाल तपमान तब्बल ५० अंशांपर्यंत पोहचते), पावसाळा धो धो तर हिवाळा कडक (म्हणजे फक्त बर्फ पडायचा बाकी असतो अशा किमान २ ते ३ अंशांपर्यंत) असतो. याचा अर्थ तिन्ह...